web analytics
  

Mang Oded Katépa Covid-19. Hayu, Jalankeun Protokol Kaséhatan

Jumat, 8 Januari 2021 14:23 WIB Dudung Ridwan
Bandung Baheula - Bandungan, Mang Oded Katépa Covid-19. Hayu, Jalankeun Protokol Kaséhatan, Wali Kota Bandung Oded M. Danial,Oded M. Danial positif Covid-19,protokol kesehatan covid-19,Satgas Penanganan Covid-19

Wali Kota Bandung Oded M. Danial dan Wakil Wali Kota Bandung Yana Mulyana. (Dok Humas Pemkot Bandung)

BANDUNG, AYOBANDUNG.COM – Sasalad Covid-19 rék ampir satahun. Mihareup turun, éh, nu katépaan Covid-19 kalah ka nérékél terus.

Nyutat tina situs covid19.bandung.go.id, nu diaksés Jumaah (8/1/2021) tabuh 12.00 WIB, Kota Bandung waé dina poé Kemis (7/1/2021) peuting ngalaporkeun jumlah total kasus positif Covid-19 lobana 6.014—di antarana 574 kasus aktif, 5.284 kasus cageur, sarta 156 kasus maot.

Kacatet, aya tambahan 31 kasus positif aktif dibandingkeun jeung data saméméhna. Malah warta nu paling akhir ditarima, Wali Kota Bandung Oded M. Danial katépaan Virus Covid-19.

Mang Oded ngaimbau ka warga Kota Bandung kudu leuwih disiplin dina nerapkan protokol keséhatan 3 M--Maké masker, sibanyo Maké sabun, jeung Mastikeun jarak anggang 2 meter. Sarta tong ruang riung.

"Warga Kota Bandung kudu tetep ngajaja kebugaran, dahar dahareun nu séhat tur loba gizina, sarta kudu tetep optimistis jeung sabar dina narima ujian sasalad ieu," ceuk  Mang Oded.

Mang Oded ayeuna keur ngajalankeun isolasi mandiri.

Kukituna, Satgas Penanggulangan Covid-19 teu bosen-bosen gumajak ka masarakat supaya terus  ngajalankeun Protokol Kaséhatan--3 M:

1. Tong poho Maké masker. Naha kudu maké masker?

Mikanyaah ka diri sorangan

Masker téh nyegah asupna droplét nu kaluar ti batur nu batuk, beresin, atawa nyarita sangkan urang teu katépaan.

Mikanyaah batur

Masker nahan droplét anu kaluar keur urang batuk, beresin, atawa nyarita sangkan teu népakeun ka batur

2. Mastikeun ngajaga jarak anggang 2 meter jeung ulah ruang riung. Naha jaga jarak anggang penting?

Ceunah, droplét nu kaluar waktu urang keur batuk—lamun urang teu maké masker—bisa nyebrot nepi ka 2 meter.

Lamun urang keur nyarita, aérosol sarua bisa nyebrot nepi ka 2 meter. Komo deui lamun urang beresin, droplét bisa nyebrotna nepi ka 6 meterna.

Kucara tetep ngajaga jarak anggang, urang bisa ngurangan résiko katepaan atawa nepaan ka batur.

3. Mindeng sibanyo maké sabun

Virus paéh ku sabun jeung ku cai ngocor. Jalankeun sibanyo kalawan bener, nyaéta sibanyo maké sabun dina cai nu ngocor salila sakurang-kurangna 20 detik. Atawa sibanyo maké handsanitizer nu kandungan alkoholna minimal 20%.

Covid-19 mangrupa matérial leutik anu dibungkus ku protéin jeung lemak. Sabun bisa ngaleyurkeun ieu virus nepi ka ancur jeung paéh.

Kumaha lamun euweuh cai jeung sabun? Urang bisa ngagunakeun handsanitizer.

Iraha? Sing remen wé. Utamana méméh nyabak panon, irung, jeung baham.

 

Editor: Dudung Ridwan

artikel terkait

dewanpers