Hajat Demokrasi Kabupaten Bandung. Nia: Dibandingkeun Ngalahirkeun, Asa Tegang Nyoblos
TPS 05 Desa Pananjung, Kecamatan Cangkuang. (dudung ridwan/ayobandung)
SOREANG, AYOBANDUNG.COM – Warga Kabupaten Bandung, poé ieu, 9 Desember 2020, boga “hajat demokrasi” Pilkada Kabupaten Bandung (2020). Pamilih nu kacatet di daftar pemilih tetap (DPT) réana 2.356.412. Bakal datang ka tempat pemungutan suara (TPS) nu réana 6.874.
Aya tilu paslon nu aub di Pilkada Kabupaten Bandung ayeuna, nyaéta Pasangan Nomer 1 Kurnia Agustina-Usman Sayogi; Pasangan nomer 2 Yena Iskandar Masoem-Atep Rizal; Pasangan nomer 3 Dadang Supriatna-Sahrul Gunawan.
Calon Bupati Bandung nomor 1 Kurnia Agustina nétélakeun teu siga biasana asa ngarasa tegang datang ka TPS téh. Calon bupati nu akrab disapa “Téh Nia” téh kacatet di TPS 15 Desa Gunung Leutik, Kecamatan Ciparay, tabuh 09.00 WIB dibarengan ku putrina.
"Lamun dibandingkeun jeung ngalahirkeun, asa tegang ayeuna," ceuk Téh Nia.
ayo baca
Ceuk Téh Nia, ngalahirkeun mah tarohanna ngan saukur diri sorangan, tapi jadi calon pamingpin mah nu bakal ditarohkeun téh lain saukur nyawa sorangan, tapi jutaan masarakat kabupaten nu ngarojong ka di dirina. “Jadi leuwih tegang. Tapi, insya Allah yakin. Geus menta du’a ti kolot,” pokna.
Samentara, calon Wakil Nia, Usman Sayogi kacatet bakal nyoblol di TPS 15, Desa Parungserab, Kecamatan Soreang.
Salian Nia, calon bupati nu bakal nyoblos poé ieu teh, nyaéta calon nomer 3 Dadang Supriatna. Dadang bakal nyoblos di TPS 24 Desa Tegalluar, Kecamatan Baleendah.
Yena, Atep, jeung Sahrul Gunawan mah teu nyoblos da ktp-na teu kacatet di Kabupaten Bandung. Yena di Kota Bandung, Atep di Kabupaten Cianjur, jeung Sahrul di Bogor. (Tingali oge Mildan Abdullah, Ayobandung.com, “Nia Mengaku Lebih Tegang Nyoblos daripada Melahirkan”)
