web analytics
  

Curug Batu Témplék Tempat Wisata nu Murah Meriah

Sabtu, 5 Desember 2020 13:53 WIB Euis Rohayati
Bandung Baheula - Bandungan, Curug Batu Témplék Tempat Wisata nu Murah Meriah, Curug Batu Templek,Wisata di Bandung Timur,Batu Templek tempat wisata murah meriah

Curug Batu Templek. (Euis Rohayati)

BANDUNG, AYOBANDUNG.COM – Masyarakat Bandung Timur jeung  sabudereunana ayeuna boga tempat wisata nu murah meriah, nyaéta kawasan wisata Curug Batu Témplék. Lokasi Curug Batu Témplék pernahna aya di  Kampung Cisanggarung, Desa Cikadut, Kecamatan Cimenyan, Kabupaten Bandung.

Ieu curug teh istuning basajan pisan. Ma’lum can dikelola sacara profrésional, boh ku pihak pamaréntahan, boh ku pihak swasta. Sanajan kitu, Curug Batu Templek kaasup destinasi alam nu éndah. Jenis batu morf, nu kabentuk kulantaran faktor parobahan tina tekanan udara jeung suhu nu tinggi di jero perut bumi.

Cai curug nu ngalir ti luhur tebing nu lungkawing mapay kana lémpengan-lémpéngan batu nu ngéntép aripis. Warna batuna konéng kaemasan. Éksotis, pikeun nu daratang néangan hiburan. Ngan, minggu kamari mah, ninggang keur halodo jadi cai nu nyurugna leutik pisan.

Harga tikét asupna ogé kawilang murah saukur Rp 10.000.  Fasilitas nu aya di sabudeureun lokasi, ngan aya warung nu nyadiaan kadaharan jeung inuman. Salian ti éta, aya WC umum, ogé aya aréa tempat parkir. 

Kamonésanana mah meureun pédah éta aya sasak gantung di luhur nu ngebat ti mimiti curug tebing béh kulon nepi ka tebing béh wétan, nu ngahaja dijieun pikeun nguji adrenalin para pangunjung.

Aya ogé nu sakadar hayang difoto atawa selfi di luhur sasak. Pangunjung nu arék naék meuntas kana sasak, dikeunakeun tarif Rp10.000. Saméméh meuntas, kudu maké heula pelindung diri, safety belt jeung helm, nu geus disadiakeun sakaligus dipangmasangkeun ku patugasna.

Editor: Dudung Ridwan
dewanpers