web analytics
  

Rébuan Kolécér Muter di Mumunggang Gunung

Senin, 23 November 2020 14:42 WIB Dudung Ridwan
Bandung Baheula - Bandungan, Rébuan Kolécér Muter di Mumunggang Gunung, Taman Kolecer,Taman Wisata Kolecer Desa Jatisari,Lembur Awi Jatisari

Kampung Kolecer (dudungridwan/Ayobandung.com)

SORÉANG, AYOBANDUNG.COM – Rébuan kolécér rupa-rupa warna—biru, beureum, héjo, bodas, konéng--ligar lir kembang nu aya di mumunggang gunung Lembur Awi, Desa Jatisari, Kecamatan Cangkuang Kabupaten Bandung. Di luhur rébuan kolécér aya sasak awi—siga darmaga--paragi sélfi.

Angin gunung ngahiliwir tiis karasa kana awak. Siga nyusutan késang alatan capé geus leumpang nanjak. Ogé, ngoyagkeun dangdaunan sakaligus muterkeun rébuan kolécér nu aya dina mumunggang. Aya sora ngahiung tapi teu pati tarik. Éndah pisan.

Ribuan Kolecer di Jatisari (dudungridwan/ayobandung.com)

Mun hayang ka Lembur Awi atawa katelahna Kampung Kolécér bisa asup ti sabababaha hiji jalan. Ti Jalan Nagkrak, Jalan Bandasari Citaliktik, atawa ti Bumi Parahyangan Kencana Polres Bandung. Terus wé lempeng kénéh. Lamun tas kurang leuwih 6 kilometer, tatanya di mana LA alias Lembur Awi, Taman Kolécér, pasti papada apal.

Komo poéan Sabtu jeung Minggu mah. Da LA mah geus kaasup jalur gowéser. Para gowéser ti mana-mana tamplok ka dinya. Jalurna mémang cocok pisan jang para gowéser mah, nanjak mudun—di kénca katuhu mangrupa kampung nu asri kénéh diselang seling ku leuweung, kebon, jeung pasawahan. Amanlah, teu pasuliwer ku mobil.

Lembur Awi Jatisari (dudungridwan/ayobandung.com)

Sanajan di kampung, tong sieun jalanna butut. Aslina, jalanna geus ku beton kabéh.

Kacapé geus sasapédahan bakal kaupahan mun geus nepi di Lembur Awi. Tangkal awi jararangkung. Daunna matak jadi iuh. Euweuh kalakay nu bala da patugas kabersihan terus sasapu. Taneuh téh meni laleuning.

Sawung nu daragang jujumplukan. Badé pesen liwet dadakan jeung beuleum asin ditambahan sambel tarasi nu lada aya. Ogé, bilih badé karokéan aya. Pami hoyong ngadangu wungkul, panyanyi na aya. Mung kedah disiapkeun kanggé sawérna. Grup ibu-ibu nu maké seragam nu ngakuna ti Bandasari katinggal datang, langsung miluan joged.

Beuki beurang, para gowéser narungtutan datang. Sapédahna diparkir rapih di tempatna. Pesen kopi hideung, terus gogolédagan di sawung bari ngadangukeun lagu dangdut.

Ngan cukup mayar Rp10 ribu jang asup ka lahan nu luasna dua héktar ieu. Rada nanjak saeutik, salira tiasa sélfi nu latarna rébuan kolécér. Barudak leutik bisa ogé arulin ayun-ayunan da aya tempat husus kanggé barudak.

Editor: Dudung Ridwan
dewanpers