web analytics
  

És Céndol Katapang Raos Pisan

Senin, 16 November 2020 14:29 WIB Dudung Ridwan
Bandung Baheula - Bandungan, És Céndol Katapang Raos Pisan, Es Cendol Katapang,Es Cendol Elizabet,Kuliner Bandung

Es Cendol Katapang (istimewa)

AYOBANDUNG.COM – Upami salira pabeubeurang—keur meujeuhna panas mentrang-mentring—heug ngaliwat ka Jalan Raya Kopo-Katapang KM 12,5—boh rék ka Ciwidéykeun atawa rék ka Bandungkeun—éta waktu nu sampurna pikeun nyimpang ka És Cendol Katapang.

Lamun ti Bandung mah ayana lebah kénca sanggeus Borma Katapang. Lamun ti arah Soréang lebah katuhu. Ayana di juru, hareupeun toko palastik, pas pisan handapeun lampu merah Katapang.

Éta jongko és cendol téh tabuh 12 beurang kakara buka. Nepi ka jam 5 soré. Tapi, tabuh 3 an gé biasana geus béak. Komo mun usum halodo mah. Tempatna teu alus-alus teuing. Lamun ngahaja jajan di tempat—komo keur loba nu meuli mah—rada walurat. Hadé na mah dibungkus waé. Kacuali salira teu kuat, hanaang kacida.

És Cendol Katapang geus sohor pikeun sabundeureun daérah Kopo-Katapang-Soréang-Banjaran mah. Dina soal rasa, wani ngadulah jeung és céndol nu leuwih sohor, Céndol Elizabet nu di Tegallega. Kagurihan rasana, kakentelan cipatina, jeung enyoy céndolna.

Harga sagelasna Rp7.000. Mun dibungkus, aya pakét nu Rp15.000 jeung Rp25.000.

Tapi, ceunah ceuk Pa Ahmad—nu boga usaha és céndol Katapang—usaha és cendolna, teu ngaleuleungit, kainspirasian ku céndol Elizabet. Baheula, Pa Ahmad mikaresep pisan ka éta céndol Elizabet, nepi ka boga impian hayang nurutan usaha és cendol.

Impianna laksana, taun 1999 mimiti dagang ngurilingan kampung. Nepi ka boga tempat siga ayeuna di Parapatan Katapang.

Nyaan, aslina raos pisan. Pami tos sakali, bakal deudeuieun.

Editor: Dudung Ridwan

artikel terkait

dewanpers