web analytics
  

Bosen di Imah, Miara Manuk jadi Hiburan

Kamis, 12 November 2020 18:54 WIB Dudung Ridwan
Bandung Baheula - Bandungan, Bosen di Imah, Miara Manuk jadi Hiburan, Memelihara burung di tengah pandemi,Jalak Suren,Burung Kenari,Murai Batu

Jalak Suren (istimewa)

AYOBANDUNG.COM -- Usum sasalad (pandemi) nu taya--jeung iraha--tungtungna matak strés. Komo cicing waé di imah matak kesel.

Aya sababaraha kagiatan nu bisa dilakukeun. Tamba kesel bari ngahibur diri. Umpamana miara lauk hias—golsom, arwana, koi, jeung sajabana. Atawa nu resep kana manuk, bisa miara manuk océhan.

Salian keur hiburan, mun ku leukeun miarana, oge bisa ngahasilkeun duit.

Miara manuk, tong nu araranéh, nu populér wé méh gampang miara jeung ngajualna deui. Ieu aya sababaraha manuk nu populér tur babari miarana.

 

Jalak Surén

Jalak Surén loba dikukut alatan ku resep, jang ngajaga imah, ogé jang pamancing manuk lain sangkan sina nyora. Tapi, utamana mah jang ngajaga imah.

Da lamun aya jelema rentang-rentang—komo kanu teu wawuh mah-- Jalak Surén mah tara daék cicing, hayoh wé disada. Lamun getén miarana, manuk ieu mah aya nu nepi ka bisa ngomong sagala.

Jeung miarana teu bangga, cukup diberé poer top song atawa sasakali diberé hileud hongkong atawa jangkrik. Babari diternakeun. Hargana ékonomis, ti mimiti bakalan Rp300 rebu-nepi ka Rp1,5 juta.

 

Kenari

Kenari gé salah sahiji manuk populér nu loba dipiara. Manukna leutik sagedé piit. Tapi, warnana rupa-rupa. Aya oranye, konéng, bodas, abu-abu, konéng kahideung-hideungan. Lamun geus disada, leuh sorana éndah pisan. Niriktik.

Kenari mah kaasup manuk solitaire. Teu hadé lamun dua jalu disakurungkeun. Pisahkeun jadi dua kurung. Tuluy deukeutkeun—tapi ulah papada ningali—dijamin Kenari jalu éta duanana bakal ngocéh teu eureun-eureun.

Karesep Kenari aya di jero kurung nu badag tur luas. Tong kasorot panon poé langsung bisi panaseun antukna stres. Suhu nu hadé pikeun Kenari antara 18-21oC.

Kenari mah tipe manuk nu karesepna biji-bijian. Lian ti biji-bijian, beré endog puyuh jeung sayur.

Mangkadé kangdangna kudu salalawasna beresih. Beré cai dina wadah jang mandina. Sanajan leutik, Kenari aya hargaan, ti mimiti harga Rp400 rébu tepi ka sajuta.

Kenari (suara.com)

 

Murai Batu

Rada geséh mahal ti Jalak Surén jeung Kenari, Murai Batu ogé populér dipiara ku nu resep kana manuk. Warnana hideung cokelat ka konéng-konéngan matak pikaresepen. Buntutna nu panjang acung-acungan. Sorana ngoncrang, sakapeng ageum, teu anéh, mun Murai Batu hargana mahal.

Anak Murai Batu dibanderol Rp1-2 juta, tapi lamun geus gacor atawa remen meunang kontés hargana bisa nepi ka ratusan juta.

Lamun teu fit kondisina, Murai Batu mah tara disada. Sigana wé jagjag ti luar mah, tapi di jerona manuk téh keur teu séhat. Solusina, beré vitamin atawa suplemen nu ngandung nutrisi. Di toko manuk, loba vitamin rupa-rupa merk.

Beré pakan poer. Aya sababaraha merk poer khusus jang Murai Batu. Beré sapoé dua kali mah.

Beré ogé ékstra food, kroto atawa jangkrik. Jangkrik hadé pisan jang manuk mah. Sapoé dua kali cukup sanggeus dipoékeun.

Murai Batu kaasup manuk nu pinter nurutan sora manuk séjén. Pamasteran atawa prosés ngasupkeun rupa sora manuk séjén maké sora manuk asli atawa audio MP3 ngabantu pisan pikeun Murai Batu méh beuki gacor jeung nyada waé.

Murai Batu (YouTube)

 

Editor: Dudung Ridwan
dewanpers