web analytics
  

Fadli Zon: Ngarobah Ngaran Provinsi Jabar ku Provinsi Sunda Asup Akal

Rabu, 11 November 2020 07:35 WIB Eneng Reni Nuraisyah Jamil
Bandung Baheula - Bandungan, Fadli Zon: Ngarobah Ngaran Provinsi Jabar ku Provinsi Sunda Asup Akal, Fadli Zon,Provinsi Sunda,Provinsi Tatar Sunda,Penggantian Provinsi Jabar

Fadli Zon di Sekretariat Kongres Sunda (ayobandung.com/irfan al-faritsi)

AYOBANDUNG.COM – Sanggeus wakil Ketua MPR, Fadel Muhammad; Eni Sumarni, anggota DPD Jabar; ayeuna giliran Anggota Komisi I DPR Fraksi Partai Gerindra Fadli Zon nu ngadukung aspirasi para inohong Jawa Barat pikeun ngarobah ngaran Provinsi Jawa Barat jadi Provinsi Sunda atawa Provinsi Tatar Sunda.

Ceuk Fadli Zon--anu datang ka sekrétarit Kongrés Sunda di Perpustakaan Ajip Rosidi, Jalan Garut No. 2, Kota Bandung, kamari Salasa (10/11/2020)--ajuan pikeun ngaganti ngaran Provinsi Jawa Barat ku ngaran Provinsi Sunda téh lain pasualan nu teu mungkin dilakukeun, komo deui ieu mah geus mangrupakeun aspirasi masarakat Jawa Barat. 

Pasualan ngaganti ngaran provinsi ieu asup akal sabab, ceuk Fadli, komo lamun ningali sajarah ka tukang, Tatar Sunda téh kapan mangrupakeun hiji wilayah nu boga sajarah panjang di Indonésa.

"Tanah Sunda atawa Negeri Pasundan boga sajarah nu panjang. Titinggal artéfak arkéologis nu aya negeskeun (Tatar Sunda) di abad ke-4, malah abad ke-2,  sebelum masehi umpamana geus aya Arca Domas di Bogor. Èta téh 5.000 taun ka tukang," ceuk Fadli sanggeus gempungan pra Kongrés Sunda.

Fadli gé nétélakeun, nurutkeun fakta sajarah, geus kasebut Kepulauan Sunda Besar jeung Kepulauan Sunda Kecil. Malah, ceuk Fadli, Nagara Pasundan kungsi dipingpin ku dua presidén. 

"Jadi, lamun aya usulan atawa aspirasi ngaran Pasundan atawa Sunda jadi ngaran provinsi, saéstuna éta geus nguatkeun kabinékaan bangsa urang sabab geus aya sabagian provinsi nu maké ngaran suku, ngaran étnis," ceuk Fadli.

Saméméhna, Fadli ogé ngusulkeun Provinsi Sumatera Barat diganti ku ngaran Provinsi Minangkabau. Jadi, ceuk Fadli, ayana aspirasi sababaraha tokoh nu hayang ngaganti ngaran Jawa Barat sah-sah waé. 

"Komo deui mayoritas ra’yat Jabar mangrupakeun étnis Sunda nu boga kaistimewaan ti jaman baheula. Nu ngaranna Batavia, jaman Belanda mah asup ka wilayah Jawa Barat atawa Pasundan. Kabudayaanna ogé malah nepi ka wilayah administrasi Jawa Tengah," bébér Fadli.

Tapi, tangtuna pro jeung kontra ceuk Fadli pasti aya waé, utamana ti palebah wates wilayah nu teu satuju kana ngaganti ngaran Provinsi Jabar. Di Jawa Barat, sacara umum, salain Suku Sunda, ogé aya Suku Bangsa Cirebon nu deukeut jeung Jawa Tengah. 

Salain éta, wilayah Jawa Barat ogé nyakup wilayah Bekasi jeung Depok. Di wilayah éta loba ogé suku bangsa Betawi. Kusabab kitu, Fadli nyarankeun, hadéna kudu aya dialog pikeun ngabahas kahayang masing-masing pihak.

"Ceuk kuring mah moal nanaon mun ngayakeun dialog jeung masarakat Betawi ngenaan pasualan ieu, ogé  jeung masarakat  Cirebon. Kudu diayakeun dialog sabab di dua tempat éta aya pacampuran budaya. Tapi, pasualan éta bisa dimusawarahkeun," ceuk Fadli.

"Pan tadi geus dibahas bangsa urang téh aya Aceh, Papua, Bali, Lampung, Gorontalo, jeung réa deui. Jadi, ceuk kuring usulan ieu teu masalah. Pasualan éta moal ngarobah, justru nguatkeun. Dina éra globalisasi ieu, idéntitas-idéntitas nu laleutik téh justru penting, méh balik deui ka jati dirina," ceuk Fadli.

 

Urgénsi Pamekaran Wilayah

Ceuk Fadli, dinamika jeung masalah pangwangunan di Jawa Barat titik poinna aya dina jumlah populasi nu ampir 50 juta jiwa taun 2019.

Kondisi ieu téh ngalantarankeun masarakatna parebut sumber daya, tata ruang, sakola nu unggul, fasilitas kaséhatan, tepi ka transportasi.

Salah sahiji solusi jang ngendalikeun jumlah populasi di Jabar nyaéta ayana usulan pamekaran wilayah. Ieu usulan téh geus lila, ngan can aya réalisasi. Komo deui, ceuk Fadli Zon, Jawa Barat ayeuna “mengalami diskriminasi” dina pasualan distribusi keuangan. Diskriminasi éta katinggali tina anggaran pendapatan nu proséntasena henteu proporsional lamun dibandingkan jeung Jawa Tengah atawa Jawa Timur.

"Baheula téh geus aya tilu daérah di Jabar nu rék dimekarkan, tapi can laksana waé. Malah kuduna aya welasan daérah deui. Umpamana Bogor, aya usulan mekarkeun Bogor Barat jeung Bogor Timur kusabab jumlah penduduk Bogor geus aya kana 6 juta jiwa na. Jadi, geus pantes lamun dimekarkan," ceuk Fadli.

Kukituna, Fadli nyarankan perlu diayakeun gempungan para inohong jang nyieun naskah akademik nu mangrupakeun rancangan usulan ngaganti ngaran provinsi.

Mun geus jadi rancangan, éta naskah bisa diusulkeun ka anggota DPR. Utamana wawakil ti Jawa Barat, kaasup Fadli Zon sorangan nu mangrupakeun wawakil Dapil 5 Jawa Barat.

"Nu jelas mah kuring pasti ngadukung. Tangtungan éngké dibawa ka DPR nu mangrupakeun usul inisiatif ti DPR," ceuk Fadli.

 

 

 

 

 

 

Editor: Dudung Ridwan

artikel terkait

dewanpers