web analytics
  

114 Situ jeung Ranca ngan Tinggal Ngaran

Rabu, 4 November 2020 15:49 WIB Dudung Ridwan
Bandung Baheula - Bandungan, 114 Situ jeung Ranca ngan Tinggal Ngaran, cekungan bandung,Kelompok Riset Cekungan Bandung,Pakar Geografi T. Bachtiar

Asal ibu kota Kabupaten Bandung di Karapyak, di pusat gelung meander Ci Tarum (A), yang sekarang namanya menjadi Dayeuhkolot. (Dok. T Bachtiar)

LENGKONG, AYOBANDUNG.COM -- Anggota Kelompok Riset Cekungan Bandung jeung Penasihat Bandung Mitigasi Hub (BMH), T. Bachtiar nyebutkeun yén Cekungan Bandung nu aya di sahandapeun garis 725 mdpl mangrupakeun dasar Danau Bandung Purba. Tapi, kulantaran loba pangwangunan, kondisi Cekungan Bandung téh geus datar.

Cekungan Bandung téh asalna tina bituna Gunung Sunda. Kaldérana katingali kénéh di dinding Situ Lémbang. Ceuk Bachtiar, aya tilu generasi gunung di sakitaran Cekugan Bandung, nyéta Gunung Jayagiri, Gunung Sunda, jeung Gunung Tangkubanparahu nu ayeuna masih aktif kénéh.

Di Cekungan Bandung téh, aya 114 tempat nu dijieun ngaran geografi atawa toponim. Nyéta 18 ngaran geografi nu maké kecap “situ” jeung 96 nu maké kecap “ranca”.

Sakabéh situ lamun dijumlahkeun luasna aya 50 héktar. Lamun disaruakeun jeung lapangan bola, luasna 70 kali luas lapangan bola," pokna dina salamaya “Situ-Situ yang hilang di Bandung Selatan”, Senén (2/11/2020).

Hanjakal, kiwari situ, ranca, jeung balong nu aya di Cekungan Bandung ampir kabéh geus robah fungsi. Utamana situ-situ nu aya di daérah pamukiman.

"Teu karasa, saeutik-saeutik disaeur. Rék dijadikeun padumukan. Ngaran Situ Saeur téh pan hartina situ nu disaeur,” ceuk T. Bachtiar.

Conto séjénna nyéta Situ Gunting nu jadi Situgunting; Ranca Ekék nu jadi Rancaékék; Ranca Bolang nu ayeuna geus jadi kompléks perumahan Margahayu Raya. 

"Baheula mah jelema bisa sangeunahna nyaeur situ da can aya aturan hukumna. Kakara ayeuna aya aturanna," ceuk Bachtiar.

Tina 45 situ nu ditalungtik dina Peta Bandung Selatan taun 31, kiwari ngan saukur ngaran. Di Gumuruh aya situ alam. Luasna 6,5 héktar. Ayeuna geus jadi hotél jeung mol. Situgunting ayeuna geus jadi kompléks perumahan, luasna 1,5 héktar.

 

Résiko Hirup di Cekungan Bandung

Ku kituna, Bachtiar negeskeun, masarakat nu hirup di Cekungan Bandung kudu sadar yén hirup di dasar Danau Bandung Purba boga konsékuénsi. 

Konsékuénsina, tong heran lamun hiji mangsa bisa kajadian bencana alam. Tanda-tandana geus katingali. Di sababaraha kompléks perumahan ujug-ujug aya cai kaluar ti jero taneuh.

"Lamun industri di dasar Cekungan Bandung teu dikontrol palebah nyedot caina, bakal ngalantarankeun  volume cai di jero taneuh bakal ngurangan. Lamun cai ngurangan, kakuatan taneuh di luhur ogé ngurangan. Tong heran lamun aya kajadian taneuh ambleus. Rancaékék geus turun. Leuwi Gajah ogé mimiti turun," ceuk T. Bachtiar.

 

 

 

 

 

 

Editor: Dudung Ridwan
dewanpers