web analytics
  

Sidolig, Taun 1955, Jadi Saksi Persib Ngajungkeulkeun SAFA (Singapur) 4-0

Selasa, 20 Oktober 2020 14:02 WIB Dudung Ridwan
Bandung Baheula - Bandungan, Sidolig, Taun 1955, Jadi Saksi Persib Ngajungkeulkeun SAFA (Singapur) 4-0, Pemain Persib Baheula,Persib Baheula,Ade Dana bintang Persib,Sidolig stadion Persib

Persib. Ade Dana dibuleudan. (Istimewa)

AYOBANDUNG.COM -- Harita, 8 Désémber taun 1955. Ti satengah opat hujan ngaguyur Kota Bandung. Atuh, lapang Sidolig nu rék dipaké pertandingan persib ngalawan Kleub SAFA ti Singapur téh bécék.

Tapi, sanajan kitu, ka lapang Sidolig--anu geus nanjeur ti taun 1903.  Sidolig téh singkatan tina “Sport in de Openlucht is Gezond” (olahraga di luar téh séhat)-- angger panongton mah daratang. Ngan teu pati réa.

Kakuatan SAFA nu aya dina cara ngulinkeun bal jeung umpan golosor harita mah teu katingali dayana. Nya enya da gaya kitu mah moal cocok dina lapang bécék jeung loba cileuncang. Bal loba cicing katahan kucai.

Tapi, najan kitu teu beunang dileuleungit yén permainan Persib harita hadé pisan. Téhnikna lain handap-handap, sumangetna terus ngempur hurung. Éta pisan nu ngalantarkeun bal aya terus di pertahanan SAFA. SAFA dikurung satengah lapang.

Pamaén ngora Persib, Adé Dana, jadi béntang lapang. Adé téh pamaén katuhu luar. Siga nu euweuh kacapé, permaénan Adé beuki burit beuki hadé. Manéhna geus bisa némbongkeun téhnik nu kacida hadéna dina mawa bal ngaliwatan bék lawan.

Osman Djohan, pamaén kénca-tengah SAFA, meni tipaparetot ngungudag Adé. Ari balicet, ari séak muru gawang, meré pagawéan beurat nu matak tibumburanjat kiper SAFA nu dijaga ku Fook Teng.

Persib makalangan téh maké pamaén-pamaén ngora. Salian Adé, aya  Rukma, Witarsa, Adang, Omom Lateko, Toha, Hapid, Leepel, Djudju (kiper). Iwal Anas jeung Amung nu pangkolotna téh.

Adé nu ngadobolkeun gawang Singapur di babak kahiji. Di babak kadua, bagéan Witarsa nu nyieun gul sanggeus narima sodoran Adé, 2-0 jang Persib. Adé si béntang lapang nyieun deui gul nu katilu.

Giliran Rukma, pamaén katuhu tengah Persib, nu nyieun gul ka opat sanggeus meunang operan ti Adang, nu hasil mawa bal. Tajongan Rukma teu tarik, tapi kacida merenahna, nyangkoyot ka juru gawang Fook Teng.

(Sabagéan dipetik tina “SAFA Tidjuralit di Bandung” wartawan Sipatahoenan 1955 anu dimuat di Kandaga, M.A. Salmun, Penerbit Ganaco 1956.)

Editor: Dudung Ridwan
dewanpers