web analytics
  

Satgas Covid-19: Papatah Indung Geus Pasti Diturut

Rabu, 21 Oktober 2020 10:08 WIB Dudung Ridwan
Bandung Baheula - Bandungan, Satgas Covid-19: Papatah Indung Geus Pasti Diturut, Satgas Covid-19,Budaya Sunda,Sunda

Ilustrasi. (Photo by Gunawan Kartapranata / CC BY-SA 4.0)

BANDUNG, AYOBANDUNG.COM -- Singgih Wiryono téh salah saurang pasén nu kajangkit ku virus Covid 19. Singgih nyaritakeun pangalamanna kumaha papatah indungna geus méré kakuatan sangkan manéhna geura cageur.

“Papatana kieu: Tong geuring. Lamun geuring, saha nu rék nungguan?” ceuk Singgih dina acara talkshow "Perjuangan Penyintas Melawan Covid-19" ti Media Center Satgas Covid-19, Graha BNPB Jakarta, Senén (19/10/2020).

Singgih nu hirup ngarantau di Jakarta nyaritakeun yén manéhna kungsi ngalaman isolasi mandiri di imah. 

“Abdi mah cicing wé di kamar. Pun bojo nu nyumponan sagala  kahayang kuring,” ceuk Singgih.

Enya, pamajikan Singgih talatén pisan ngalayanan nu jadi salakina. Boh dina ngenaan kabersihan imah atawa dina cara ngalakukeun komunikasi jeung manéhna.

Teu saukur dirojong pamajikanna jeung kulawargana, Singgih gé dirojong ku tatanggana.

“Abdi saleresna isin tos ngarépotkeun saréréa. Pak RT sok nyiapkeun sarapan. Masker jeung handsanitizer disayogikeun teras ku anjeunna,” ceuk singgih.

Sanajan kitu, Singgih angger jeung tetep teu poho ka nu jadi papatah indungna.

“Hirup mah aya mangsana di luhur. Aya mangsana di handap. Mun keur di luhur, omat tong poho ka nu di handap,” kitu papatah indungna ka Singgih.

Naon dialaman ku Singgih dibenerkeun ku psikolog, Edward Andriyanto Sutardhio, nu jadi pamilon dina acara talkshow éta.

Ceuk Edward, indung téh kapan simbol tina katrésna, simbol tina cinta.

“Jadi, teu anéh lamun Singgih dina masa isolasi sok inget waé ka papatah indungna. Sabab, indung mah da enya simbol katresna,” ceuk Edward.

Inget kana papatah indung. Éta pisan nu jadi téma kampanye Satgas Covid 19 pikeun ngurangan sumebarna virus corona.

Malahan, tema éta téh dijieun vidéo klip musiknna. Vidéo nu durasina 30 detik téh hasil gawé bareng jeung Band Padi Reborn.

Utamana lagu ieu mangrupakeun kampanye 3 M—Maké masker; Mangkadé jaga jarak jeung tong ruang ruing; jeung Mangkadé kudu rajin kukumbah leungeun ku sabun.

Juru bicara Satgas Covid-19, Wiku Adisasmito, ngécéskeun sosok indung ngahaja dipilih jadi téma kusabab indung mangrupakeun sosok nu penting dina kulawaga. Papagah indung mah geus pasti diturut ku anak-anakna.

“Jadi, dina kampanye ieu kuring mihareup masarakat nurut ka papatah indung. Siga anak-anakna nu nurut ka papatah nu jadi indungna,” kitu ceuk Wiku Adisasmito dina konférénsi pers, Kemis (1/10/2020).

 

Editor: Dudung Ridwan

artikel terkait

dewanpers