web analytics
  

Ketua Satgas Covid-19: Mangkadé, Tong Ruang Riung

Rabu, 14 Oktober 2020 16:41 WIB Dudung Ridwan
Bandung Baheula - Bandungan, Ketua Satgas Covid-19: Mangkadé, Tong Ruang Riung, Kepala Badan Nasional Penanggulangan Bencana (BNPB) Doni Monardo,Sunda,Satgas Covid-19

Ketua Satgas Penanganan Covid-19 Letjen Doni Monardo. (BNPB)

Doni ngarasa hariwang jeung salempang lamun ningali jalma ruang riung téh.

 

JAKARTA, AYOBANDUNG.COM -- Ketua Satgas Penanganan Covid-19 nu sakaligus ngajabat Kepala Badan Nasional Penanggulangan Bencana, Letjen Doni Monardo, negeskeun yén manéhna ngarasa hariwang jeung salempang lamun ningali jalma ruang riung téh. Komo bari maranéhna teu maliré ka protokol kaséhatan.

“Nyaan, kuring mah ngarasa hariwang jeung salempang. Pan covid 19 téh sumebarna ti manusa ka manusa. Lain ti binatang ka manusa, siga flu babi,” ceuk Doni di acara talkshow Update KOMITE KPCPEN ti Media Center Satgas Covid-19 Graha BNPB Jakarta, Senén (12/10/2020). 

Doni nyebutkeun yén data bawah 7% ti pasén Covid 19 di Wisma Atlét nyaéta maranéhna nu caricing di imah.

“Data éta naon hartina? Hartina nu cicing di imah téh katularan ti kulawargana nu sok milu ruang riung di luar imah,” ceuk Doni.

Data sejénna, yén jumlah nu maraot alatan Covid 19 téh lolobana maranéhna nu geus umuran, nya antara 80-85 taun. Ieu kelompok téh mangrupa kelompok nu gedé résikona alatan boga panyakit bawaan. Kelompok ieu ogé disebut golongan komorbid.

Doni peupeujeuh, “Ku kituna, kuring teu boseun-boseun ngajak ka masarakat. Montong ruang riung. Anjeun nu masih ngalora kénéh asa ngarasa séhat. Tapi pikirkeun pan urang téh boga kolot di imah atawa boga kulawarga. Sing nyaah ka diri sorangan jeung kulawarga Anjeun.”

Doni teu boseun-boseun ngajak ka masarakat supaya nerapkeun protokol kaséhatan nu disebut 3 M téa—maké masker, mangkadé jaga jarak, montong poho ngumbah leungeun maké sabun.

13 Pendémo di Bandung Réaktif

Polrestabes Bandung ngamankeun 209 pendémo di Bandung. 209 urang téh ti dua kali kajadian démo nu ngabalukarkeun kakacauan di hareupeun Gedung DPRD Provinsi Jabar, Rebo (7/10/2020). 

Wakapolrestabes Bandung, AKBP Yade Setiawan Ujung, nyebutkeun 209 urang nu diamankeun téh kabéh miluan rapid test di lapang Polrestabes Bandung.  Sanggeus miluan rapid test, hasilna 13 urang réaktif corona.

Atuh, nu 13 urang éta langsung dibawa ka Rumah Sakit Sartika Asih nu tuluy miluan swab test.

Yade nyebut, padahal polisi sok méré imbauan ka nu darémo yén mangkadé tong poho ngajalankeun protokol kaséhatan.

“Ieu nu dipikasieun ku urang. Kukituna, lamun masarakat méré ‘surat pemberitahuan Unjuk Rasa dan Berkumpul’, kuring sok méré saran mun bisa mah montong. Sabab, ayeuna mah résikona gedé,” ceuk Yade.

Yade ngajelaskeun, nu 13 urang ieu téh pastina panggih jeung baturna. Panggih jeung kulawargana. Antukna, siga multilevel marketing wé, tétélépta kabéh keuna ku corona.

Editor: Dudung Ridwan

artikel terkait

dewanpers