web analytics
  

Dogér Monyét

Senin, 28 September 2020 11:33 WIB Dudung Ridwan
Bandung Baheula - Bandungan, Dogér Monyét, Doger Monyet,fiksimini,Sastra dan Budaya

Ilustrasi Monyet (Pixabay)

Tabuh dua belas. Keur mentrang-mentring. Lampu di parapatan beureum. Motor jeung mobil areureun. Dogér monyét ngamimitian. Nang néng! Nang néng! Si Emang nakokan kolénang. Biur, monyét numpak motor bulak-balik. Ditarik talina, jug indit ka pasar bari mawa payung. Kadéngé hawar-hawar azan Lohor ti masjid. Ditarik deui talina ku si Emang, si monyét dititah shalat Lohor. Sujud dina sajadah. Geus shalat, terus si monyet perang—mawa bedil. Duit lang lung ti nu numpak motor jeung mobil.

Lampu hejo hurung. Dogér monyét eureun.

Kitu jeung kitu tepi rék reup magrib. Monyét geus shalat Lohor jeung Asar ditambah shalat sunat. Si Emangna mah teu katingali shalat. Sibuk ngitung duit sawéran.

 

Editor: Dudung Ridwan
dewanpers