web analytics
  

Baheula Balé Nyungcung, Ayeuna Masjid Raya Jawa Barat

Jumat, 25 September 2020 14:04 WIB Dudung Ridwan
Bandung Baheula - Bandungan, Baheula Balé Nyungcung, Ayeuna Masjid Raya Jawa Barat,  bale nyungcung,Masjid Agung,Masjid Raya Jawa Barat,Masjid Al-Ukhuwah

Bale Nyungcung (COLLECTIE TROPENMUSEUM)

Aya dua vérsi nu nyebut iraha kira-kira Masjid Agung—ayeuna Masjid Raya Jawa Barat—nanjeur. Hiji vérsi nyebut taun 1810. Vérsi séjén nyebut masjid ieu nanjeur taun 1812. Tapi, nu jelas Masjid Agung ieu kaasup masjid paling kolot di saputaran Bandung mah.

Ceuk nu vérsi taun 1812, masjid ieu téh diwangun babarengan jeung pindahna pusat pemerintahan ti Dayeuhkolot (di Bandung kidul) ka Bandung. Dina buku Ramadhan di Priangan nu ditulis ku Haryoto Kunto disebutkeun basa mimiti diwangun taun 1812, wangunan masjid ngan saukur panggung nu basajan, dijieun tina awi. Luhurna tina hateup.

Cenah, Masjid Agung téh ayana kuloneun Alun-Alun. Paeunteung-eunteng jeung Balé Bandung (Gedung Palaguna ayeuna). Balé Bandung téh wangunan paragi narima tamu-tamu penting.

Gaya arsitéktur masjid bergaya Sunda. Luhurna Masjid Agung téh nyungcung siga gunung. Tilu lapis. Matakna masjid ieu ogé osok disebut Balé Nyungcung. Nu ngabédakeun yén wangunan ieu tempat ibadah, nyaéta di tepasna aya balong gedé tempat wudhu.

Geuning, cai dina balong gedé ieu téh kungsi nyalametkeun masjid tina kahuruan badag. Harita taun 1825. Cai balong dipaké nyimbeuhan seuneu nu ngaléléntab. Saprak ti harita masjid agung ieu dirénovasi saeutik-saeutik.

Lamun diitung masjid ieu geul ngalaman 8 kali rénovasi. Tilu kali di abad ka-19, 5 kali di abad ka-20.

Taun 2000-an, rénovasi gedé-gedéan dilakukeun ku Gubernur Jabar harita, nyéta H.R. Nuriana. Luhur masjid nu siga joglo patumpuk téh dirobah jadi kubah badag siga nu ayeuna.

Lain éta wungkul, dipasangan dua menara. Diresmikeun tanggal 4 Juni 2003, ngaran “Masjid Agung” gé dirobah jadi “Masjid Raya Jawa Barat”.  Status Masjid Agung Kota Bandung ayeuna dicepeng ku Masjid Al-Ukhuwah di Jalan Wastukancana.

Editor: Dudung Ridwan
dewanpers