web analytics
  

Odading Viral: Ieu Sajarahna

Jumat, 18 September 2020 10:14 WIB Dudung Ridwan
Bandung Baheula - Bandungan, Odading Viral: Ieu Sajarahna, Odading Mang Oleh,Odading viral,Odading Bandung,Gubernur Jawa Barat Ridwan Kamil

Pembeli antre untuk membeli Odading Mang Oleh yang viral. (Ayobandung.com/Fichri Hakiim)

Odading, dahareun kelas “dua” nu dijieun tina tarigu, endog, campur gula--anu bentukna segi opat--ayeuna keur “naék daun” saprak Adé Londok ngapromosikeun warung odading Mang Oléh nu aya di jalan Baranang Siang Bandung léwat vidéo di Youtobe. Cara Adé promosi “béda” jeung lucu. Teu disangka, vidéo éta jadi viral. “Ngadahar odading ieu asa jadi Ironman,” ceuk Ade. Komo sanggeus Gubernur Jawa Barat Ridwan Kamil jajan ka warung ieu tuluy ngobrol jeung Adé Londok bari disiarkeun ku sababaraha stasiun tv teu kurang viralna. Atuh, warung odading Mang Oléh kasinugrahan rezeki.

Ceuk sumber ayobandung.com, cenah omsét warung odadi Mang Oléh ayeuna naék sapuluh kali lipat. “Nu biasana omsétna ngan sajuta sapoé. Ayeuna naék 10  kali lipatna. 11 pagawé unggal poé dikerahkeun jang ngalayanan nu meuli,” ceuk Agus Rusmana, putra Mang Oléh.

Padahal nya nu ngaranna odading mah kitu-kitu kénéh. Ngan ku cara promosi nu hadé ditambah campur tangan “nasib baik” bisa ngarobah jalan hirup. Ah, jadi hayang ngadongéng ngenaan odading.

Ceuk Remy Silado—tingali 9 dari 10 Kata Indonesia Adalah Asing—dahareun odading lahir di tanah Sunda. Ngaran odading asalna tina omongan saurang nyonya Walanda.

Hiji waktu, anak nyonya Walanda éta téh léwéh hayang kuéh nu didagangkeun ku hiji budak nu gororowokan ngurilingan kampung. Kuéh éta teh can aya ngaranna, dijieunna tina tarigu, endog, jeung gula terus digoréng. Si nyonya Walanda panasaran, terus nyalukan nu budak nu dagang. Pas daun pisang nu nutupan kuéhna dibuka, si Nyonya Walanda ngomong dina basa Walanda, “O, dat ding?” Hartina, “O, nu kieu?”

Tah, kitu cenah sajarahna.

Di Bandung, nu dagang odading hampir pasti dagang cakué, kaasup warung odading Mang Oléh. Djual di toko kuéh atawa didagangkeun dina roda sisi jalan. Malahan aya nu dagang nguriling ka imah-imah. Odading pas maturan salira pami keur ngopi pasosoré. Pami cakué khusus kanggé salira nu resep kuéh asin. Biasana mah dicocolkeun kana saos nu lada.

Editor: Dudung Ridwan

artikel terkait

dewanpers