web analytics
  

RSHS Sababaraha Kali Ganti Ngaran

Jumat, 11 September 2020 04:18 WIB Dudung Ridwan
Bandung Baheula - Bandungan, RSHS Sababaraha Kali Ganti Ngaran, Rumah Sakit Hasan Sadikin (RSHS),sejarah,Haryoto Kunto,COVID-19

RS Hasan Sadikin (RSHS)

Baheula mah ngaranna téh lain Rumah Sakit Hasan Sadikin, tapi “Het Algemene Bandoengsche Ziekenhuis”, Rumah Sakit Umum Bandung. Mimiti diwangun taun 1920 keur jaman panjajahan Walanda. Tanggal 15 Oktober taun 1923 réngsé diwangun nu langsung diresmikeun ku pamaréntah Walanda.

Duka teuing kunaon ngan opat taun umurna ngaran “Het Algemene Bandoengsche Ziekenhuis” téh. Ngaran ieu rumah sakit téh tuluy barobah deui jadi "Het Gemeente Ziekenhuijs Juliana" (Rumah Sakit Kota Juliana). Meureun nyokot ngaran ti Ratu Walanda, Juliana.

Ti harita gé ieu gedong rumah sakit geus tohaga. Geus mampuh nyadiakeun 300 kamar jang pasén pasénna. Genep urang dokter Walanda kapancénan tugas ngalayanan pasén. Dua dokter bangsa urang gé miluan, nyaéta  dr. Tjokro Hadidjojo jeung dr. Djundjunan Setiakusumah.

Taun 1942, aya kajadian Perang Pasifik. Walanda gancang ngarobah ngaran "Het Gemeente Ziekenhuijs Juliana" jadi Rumah Sakit Militér Walanda. Jepang teu cicing. Komo harita tantara Jepang keur meujeuh kuat-kuatna. Walanda digempur, dipaksa “angkat kaki” ti Tanah Air. Antukna, Pulau Jawa aya dina kakawasaan Jepang. Atuh, ngaran rumah sakit militer téh barobah deui jadi “Rigukun Byoin” (Rumah Sakit Angkatan Darat). Da saha nu boga kawasa, éta nu bébas méré ngaran.

Taun 1945 Indonesia mardéka. Proklamasi diikrarkeun tanggal 17 Agustus 1945 ku Sukarno-Hatta di Jakarta. “Rigukun Byoin” balik deui ka pangkuan kakawasaan Walanda. Ahirna, ti mimiti taun 1948 fungsi rumah sakit téh barobah jadi pusat pelayanan kaséhatan jang umum nu dipingpin ku urang Walanda W.J. van Thiel. Manéhna ngajabat diréktur téh ti mimiti Jepang boga kawasa di Priangan. Thiel masih kénéh mingpin rumah sakit tepi ka taun 1949. Saterusna, rumah sakit dipingpin ku Dr. Paryono Suriodipuro tepi ka 1953.

Sumber Ayobandung, nu ditulis ku Nur Khansa(5 September 2020) teu nyebutkeun ti iraha ngaran Rancabadak jadi ngaran rumah sakit ieu. Cenah, “Éta mah ngaran landihan ti masyarakat wé.”

Haryoto Kunto di Bandung Tempo dulu (tingali Ayobandung.com, Kemis, 3 September 2020) nyebutkeun yén di sababaraha tempat di Kota Bandung baheula mémang jadi tempat pangguyangan badak—di wewengkon Cisitu, kaléren ITB, Wastukencana, RSHS ayeuna, jeung Cibadak, kuloneun Pendopo Kota Bandung. “Jadi, teu anéh mun loba tempat dingaranan ‘badak’.

Taun 1954, sakit Rumah Sakit Rancabadak ditetepkeun jadi rumah sakit provinsi nu diawasi langsung Departemen Kesehatan. Taun 1956 Rumah Sakit Rancabadak dijadikeun rumah sakit umum nu bisa nampung 600 pasén. Tuluy, pamaréntah nyieun Fakultas Kedokteran Universitas Padjadjaran (FK Unpad). Diréktur jeung dékan nu munggaran nyaéta Dr. Hasan Sadikin.

Dr. Hasan Sadikin tilar dunya tanggal 16 Juli 1967. Manéhna gedé pisan jasana pikeun kamajuan ieu rumah sakit. Kanggé ngajénan jasa-jasa dr. Hasan Sadikin, pamaréntah ngarobah deui ngaran Rumah Sakit Rancabadak jadi Rumah Sakit Umum Pusat Dr. Hasan Sadikin atawa RSHS.

RSHS ayeuna jadi salah sahiji pusat rujukan Covid-19 di Jawa Barat.

 

Editor: Dudung Ridwan

artikel terkait

dewanpers