web analytics
  

Panineungan Urang Gang Masjid ka Pelukis Jeihan Sukmantoro

Rabu, 9 September 2020 10:22 WIB Aan Merdeka Permana
Bandung Baheula - Bandungan, Panineungan Urang Gang Masjid ka Pelukis Jeihan Sukmantoro, lukisan,Jeihan Sukmantoro,Cicadas,Seni Bandung

Jeihan Sukmantoro di studiona (Aan Merdeka Permana)

Jeihan Sukmantoro, sang maéstro lukis, geus taya dikieuna, maot di Padasuka Bandung dina 29 November 2019. Urang Gang Masjid 1, Kelurahan Babakan Surabaya, Kacamatan Kiaracondong Kota Bandung, mah boga panineungan anu husus. Ti taun 1960-an, Jeihan geus jadi warga RT 04 RW 05 Kelurahan Babakan Surabaya. Sanggeus jadi jalma beunghar, pindah ka gedong sigrong di Jalan Padasuka kusabab karya lukisna ngalanglang dunya tur hargana gé miliaran rupia. Gedong badagna nu di Jalan Padasuka beuki didareugdeug boh ku anu sakadar hayang ngobrol tepi ka subuh, tepikeun ka anu mondok-moék alatan hayang kursus ngalukis.

Harita jeung kuring téh saérté, nyaéta di RT 04 Gang Masjid I. Jeihan akrab jeung tatangga. Nya tangtu wé jeung kuring gé. Anak-anakna Jeihan harita masih kénéh laleutik. Ku kuring remen dibabawa ulin jarambah, saperti ka Pasirlayung ngala jangkrik, atawa ka sawah Hantap (saméméh jadi perumahan Antapani. Ata, Adi, jeung Aga harita masih kénéh laleutik tapi geus raresep ngalukis. Ku kuring dipotrét sababaraha kali (hanjakal negatip filmna teu kapanggih). Éta téh ku sabab harita kuring boga poto tustél mérk Olympus da keur jadi wartawan freelance, ngarangkep jadi ketua Taruna Karya. Enya, harita taun 1970-an.

Hiji waktu basa rék Agustusan, anggota Tarka dititah néangan sumbangan. Basa datang ka Jeihan, manéhna kalah nitah kuring anu nyampeurkeun.

Sini, An. Kau jual aja lukisan aku, bisa laku 30 juta,” cenah. Duh, kumaha cara ngajualna jero dua poé, keur mah kuring jeung barudak Tarka teu boga konéksi ka jalma jegud anu resep lukisan.

Begini,” katanya. “Aku pingin nyumbang kegiatan kalian. Tapi, masa musti ngasih seribu perak? Hilang gengsiku sebagai pelukis tenar. Tapi aku ngga punya duit. Coba kamu jual lukisan aku. Berapa kamu bisa jual, itulah buat kegiatan Agustusan!” cenah deui. “Berapa panitia musti ngumpulin duit?”

Tiga puluh ribu rupiah!”

Nah, kamu bodoh kalo ngga mau duit 30 juta,” cenah. Tapi tétéla panitia teu bisa mayukeun lukisan Jeihan anu cenah hargana 30 jutaeun.

 “Mas, ngga laku …,” cekéng téh.

Ya, udah. Barang musti kembali. Sebab kalo aku yang jual ini lukisan, seratus juta. Seratus juta, An. Betapa mewahnya pesta Agustusan kamu bila punya dana seratus juta,” cenah.

Tuh, kamu bodoh, kan?” ceuk Jeihan.

Tapi kuring paham, sabenerna Jeihan ogé teu gampang kitu baé. Dina jaman harita, pangajén masarakat kana seni lukis masih kénéh jarang, ukur para pajabat.  Pelukis Héndra bisa jadi geus meunang duit. Tapi bisa jadi ku sabab rasa simpati sabab manéhna harita keur “nginep” di LP Kebonwaru. Nya di sagigireun karyana hadé jeung has. Tapi intina, Jeihan harita memang geus jadi pelukis tingkat dunya. Remen paméran di mancanagara. Jang nyieun folder, ménta dipotrét ku kuring.

“Kamu musti bangga, An, karya jeprétan kaméra kamu sudah sampai di Paris,” cenah. Ngan saméméhna mah, Jeihan téh memang pelukis miskin. Jadi, lamun manéhna ukur dahar sapoé sakali, éta kusabab teu mampuh dahar leuwih ti sakitu. Basa kuring keur ngobrol jeung manéhna tabuh tilu soré, sangu sapiring geus aya, tapi can wani didahar. Engké wé daharna téh lamun Mang Nasir ngaliwat ngadodorong roda saté.  Tabuh opat soré roda saté Mang Nasir ngaliwat, pambakarannana ngelun ku haseup daging jeung gajih saté anu dipanggang. Tah, Jeihan kakara am dahar sangu wungkul. Minangka deungeun sanguna téh, ambeu haseup saté.

Sanggeus beunghar, angger tara masak di imah. Bisa jadi pamajikan Jeihan teu bisa masak, bisa jadi alatan horéam. Barudakna anu geus rumaja, cukup dibéré duit wé sina néangan kadaharan ka luar.

Kuring ngadoa ka Jeihan bari reueus, sabab dina ninggalkeun dunya, Jeihan geus bisa ngajamugakeun kulawarga jeung dunya seni lukis.

Editor: Dudung Ridwan

artikel terkait

dewanpers