web analytics
  

Can ka Soréang mun teu ka Gading Tutuka

Kamis, 3 September 2020 09:28 WIB Dudung Ridwan
Bandung Baheula - Bandungan, Can ka Soréang mun teu ka Gading Tutuka, Soreang,Wisata Kuliner,gading tutuka,Kabupaten Bandung

Hiji kafe di Gading Tutuka rek reup magrib (ayobandung/Dudung Ridwan)

Paribasa éta pas pisan pikeun urang Soréang mah. Naha kitu? Émangna aya naon di jalan Gading Tutuka?

Jalan Gading Tutuka 1 panjangna kurang leuwih sakilo meter. Aya dua ruas jalan, nu ka kalérkeun jeung ka kidulkeun. Di tengahna dibates ku  taman nu  pinuh ku kekembangan. Rupa-rupa. Warna-warni. Pami ti jalan Raya Kopo-Soréang mah—méméh Gapura Pemda Kab. Bandung—setopan lampu mérah, méngkol ka kénca. Bras, wéh.

Jalanna alus banglus. Beton dibuleun ku aspal. Kaurus. Tungtungna mentok di Jalan Raya Soréang-Banjaran. Tah éta nu disebut Jalan Gading Tutuka 1. Maké angka hiji sotéh pédah di belah kalérna aya Jalan Gading Tutuka 2.

Taun 2010 mah jalan ieu téh teu pati ramé. Majarkeun stadion sépakbola—saméméh Jalak Harupat di Kopo--rék diwangun palebah dieu. Duka kumaha, teu jadi. Tuluy, terminal Soréang rék pindah ka dieu, bangkar. Nu paling akhir pangwangunan mol Soréang oge bolay. Tapi, ti taun 2015 saprak jlug jleg perumahan di ditu di dieu jalan Gading Tutuka téh beuki ramé. Mimitina aya Taman Kota Soréang. Samsat Soréang. Pasar Ikan Modern. TransMart Soréang. Nu panungtung RSUD Soréang bakal pindah ka dieu. Tuh, gedungna tos ngajegir. Ayeuna kamajuanna geus 85 persenan.

Atuh, nu daragang téh naluturkeun. Biasa padagang mah teu kaop aya nu ramé. Geus puguh ari padagang kaki lima mah. Untung, ti pihak Pemda jeung Satpol PP-na sigeup nertibkeun. Jalan ieu tetep kajaga kabersihan jeung kaasrianna. Komo, saprak tungtung belah kalér tembus ka Tol Soroja mah ieu jalan beuki ramé pisan. Malah, bisa disebut pusatna kuliner di Soréang mah. Atawa étalasena Kota Soréang.

Urang urut ti tungtung kidul geura. Mimiti asup lebah kénca aya bangunan unik. Ngaranna Pasar Ikan Modern Soréang. Hayang lauk naon, ti mimiti lélé, patin, tenggiri tepi ka sajabaning lauk laut aya. Mun hayang éta lauk tuluy dibeuleum maké bungbu nu seungit, nu matak neureuy ciduh, tinggal naék ka lantai dua maké lip. Duh, mani gaya make lip.

Hareupeun pasar ikan, aya ayam geprék nu hargana teu mahal, tapi kualitasna dina soal rasa wani ngadu. Tuluy maju ka tengah, jlug jleg ruko jeung kafé-kafé. Ti mimiti kafé sisi jalan tepi ka kafé nu rada ngaréstoran. Tinggal milih nu mana. Tangtuna sesuai jeung acis di saku.

Ka peutingnakeun beuki ramé. Lampu kafé-kafé buriracak burinong dibarengi, kadang-kadang, musik live. Komo malem Minggu mah. Loba nu indehoy palebah taman Soréang. Nyararumput mun ka sorot lampu mobil.

Mun isuk-isuk suasanana béda deui. Ti mimiti tukang kupat tahu, bubur hayam nu kawentar sa-Soréang, ketoprak, surabi, sangu konéng, jeung sajabana. Nu sasapédahan bur-ber ka ditu ka dieu. Maraké seragam. Paalus-alus sapédah.

Ibu-ibu garumeulis senam di hareupeun Gedung TransMart. Laguna lagu dangdut. He he.  Beuki ramé.

Pami tos capé, nu sapedahan, nu sarenam, nu lari, malipir ka tukang dagang sisi jalan. Ngeusian beuteung kosong. Atawa miceun hanaang jajan kopi atawa teh manis.

Jadi, hayu lamun ka Soreang, tong hilap nyimpang ka jalan Gading Tutuka.

Dudung Ridwan

Editor: Dudung Ridwan

artikel terkait

dewanpers